Vísindamenn sefa ótta

Rúm tíu ár eru liðin síðan David Morrison, ein fremsti geimlíffræðingur veraldar, hóf að svara spurningum frá fólki er varða mögulegan heimsendi þann 21. desember næstkomandi.

Morrison, sem einnig hefur frætt fólk um leyndardóma alheimsins og þróunarkenninguna, segir að á síðustu árum hafi þetta verkefni undið upp á sig og að augljóst sé að sumir einstaklingar séu fullvissir um að endalok mannkyns séu í nánd.

Síðustu ár hefur Morrison fengið um fjórar spurningar á dag um heimsendi. Hann segir spurningarnar oft á tíðum fjarstæðukenndar. „Þetta er auðvitað fáránleg spurning. Sumir spyrja hvort að þau eigi að reisa neyðarskýli í garðinum vegna dómsdagsins."

Þó ótrúlegt megi virðast þá snúa flestar spurningarnar ekki um kenningar Maya-ættflokksins en eitt af dagatölum þeirra rennur einmitt út 21. desember næstkomandi. Staðreyndir er sú að fólki er aðallega umhugað um Nibiru, dularfulla plánetu sem er sögð skella á jörðinni.

„Þegar ég var spurður um Nibiru fyrir fjórum árum sagði ég: „Kannski." Í dag er einfaldlega hægt að segja að það sé útilokað að slíkar hamfarir gætu átt sér stað í desember. Nibiru væri nú bjartasti hluturinn á himninum ef svo væri."

Oft hefur verið rætt um 21. desember í hálfkæringi en Morrison hefur engu að síður áhyggjur.

„Ég fæ öðru hverju skilaboð frá 11 til 12 ára gömlum einstaklingum sem segjast vera að íhuga sjálfsmorð vegna dómsdagsins," segir Morrison. „Ég get sagt þeim að hafa engar áhyggjur, að allt verði í lagi. Ég er hins vegar ekki í þeirri stöðu að geta veitt þeim sálfræðiaðstoð."

„Þann 22. desember næstkomandi mun ég fara fram á afsökunarbeiðni frá ansi mörgum," sagði Morrison að lokum.