Lögreglan frelsaði 24 þúsund konur og börn

Árið 2011 frelsaði kínverska lögreglan 8.660 börn og 15.458 konur sem hafði verið rænt. Flestum þeirra var bjargað í áhlaupum lögreglunnar á gengi mannræningja. Þetta kemur fram í nýrri skýrslu frá ráðuneyti öryggismála í Kína. Þau brottnumdu höfðu flest verið seld til ættleiðingar eða neydd til að stunda vændi.

Sú stefna kínverska stjórnvalda að hver fjölskylda megi einungis eignast eitt barn þykir ýta undir svartamarkaðsviðskipti, þar sem börn ganga kaupum og sölum. Þá hefur aukið ferðafrelsi í Kína gert mannræningjum hægara um vik. - hhs