Fyrsta sinn í 20 ár sem Liverpool og Man. United byrja bæði á tapi

Liverpool og Manchester United eru bæði stigalaust eftir fyrstu umferð ensku úrvalsdeildarinnar og sitja í 16. og 18. sæti hennar. Þetta er í fyrsta sinn síðan tímabilið 1992-93 þar sem þessir erkifjendur tapa báðir í fyrstu umferðinni.

Manchester United tapaði 0-1 fyrir Everton á Goodison Park í gærkvöldi og Liverpool steinlá 0-3 á móti West Brom á útivelli á laugardaginn.

Fyrir tuttugu árum tapaði Liverpool 0-1 fyrir Nottingham Forrest í fyrstu umferð tímabilsins og það var Teddy Sherringham sem skoraði eina mark leiksins.

Manchester United tapaði aftur á móti 1-2 fyrir Sheffield United í fyrstu umferðinni 1992-93. Manchester United tapaði reyndar tveimur fyrstu leikjum tímabilsins en tókst engu að síður að tryggja sér sinn fyrsta meistaratitil í 26 ár.