Fjölskyldan segir Scott ekki hafa verið með ólæknandi krabbamein

Fjölskylda Tony Scott, sem svipti sig lífi í gær, segir að hann hafi ekki verið með ólæknandi heilakrabbamein líkt og fjölmiðlar vestanhafs fullyrtu í gær. Blaðið The Los Angeles Times hefur eftir lögreglustjóra í borginni að fjölskyldan hafi tjáð lögreglu þetta.

Leikstjórinn hafi verið við hestaheilsu þegar hann batt enda á líf sitt. Lík Scott hefur ekki verið krufið en þegar það verður gert kemur sannleikurinn eflaust í ljós. Dauði Scott er rannsakaður sem sjálfsmorðsmál hjá lögreglunni í Los Angeles en leikstjórinn skyldi eftir kveðjubréf í bíl sínum áður en hann hoppaði niður af brú í Kaliforníu.

Fjölmargir leikarar hafa minnst Scott á samskiptasíðunni Twitter í gær og í dag.

Hann er þekktastur fyrir kvikmyndir á borð við Top Gun, Days of Thunder og Beverly Hills Cop 2.

Hann var yngri bróðir leikstjórans Ridley Scott.