Palestínumenn vongóðir um samþykki

Nokkuð öruggt þykir að allsherjarþing Sameinuðu þjóðanna fallist á að Palestína fái stöðu áheyrnarríkis þegar gengið verður til atkvæða um ályktun þess efnis í dag eða á morgun, enda hafa meira en tveir þriðju hlutar aðildarríkja SÞ þegar viðurkennt sjálfstæði Palestínu.

Ísland er meðflutningsríki ályktunarinnar, en í dag er rétt ár síðan Alþingi viðurkenndi sjálfstæði Palestínu.

Meðal annarra ríkja hafa Frakkar, Austurríkismenn, Svisslendingar, Norðmenn, Danir, Finnar og Spánverjar lýst því yfir að þeir muni greiða ályktun þess efnis atkvæði sitt, ásamt Kínverjum, Indverjum og líklega Rússum.

Bandaríkin hafa staðið á móti ályktuninni, en geta ekki beitt neitunarvaldi sínu á allsherjarþinginu eins og þeir geta í öryggisráði SÞ. Þá ætla hvorki Bretar né Þjóðverjar að greiða ályktuninni atkvæði sitt.

Palestínumenn hafa haft áheyrnaraðild að allsherjarþingi Sameinuðu þjóðanna síðan 1974, ekki þó sem ríki, heldur sem samtök, en með því að veita Palestínu stöðu áheyrnarríkis er hins vegar í reynd verið að viðurkenna sjálfstæði Palestínuríkis. Palestína fær þá sömu stöðu og Páfagarður, sem nú er eina ríkið sem hefur áheyrnaraðild án fullrar aðildar að SÞ.