Búnir að bjarga tugum ökumanna - stormur í kvöld

Björgunarsveitir á landinu eru þegar byrjaðar að bjarga ökumönnum í vanda en samkvæmt upplýsingum frá Landsbjörg hafa björgunarsveitir víða um land bjargað tugum ökumanna síðastliðinn sólarhring. Meðal annars þurfti að bjarga fimm ökumönnum á Mosfellsheiðinni.

Þá var mikið að gera hjá björgunarsveitum á Holtavörðuheiði, Lyngdalsheið skammt frá Borgarnesi, Mývatnsheiði og Vatnaleið.

Aðstæður hafa verið slæmar. Vindur mikill og mikil hálka. Þannig hafa ökumenn verið að missa faratækin út fyrir veg. Aðrir hafa fest sig í snjónum. Landsbjörg hvetur ökumenn til þess að gaumgæfa veðurspána áður en þeir leggja af stað, enda ekki nóg að líta út um gluggann. Björgunarsveitarmenn hafa bjargað misvel búnum bílum.

Þá ber að árétta að það er ekkert ferðaveður seinnipartinn í dag. Veðurstofan spáir stormi á landinu öllu. Búast má við öflugum vindhviðum. Þannig verður vindhraði víða 18 til 23 metrar á sekúndu undir kvöld en allt að 25 metrum á sekundu norðvestantil á landinu og á miðhálendinu.