Trylltur maður olli næstum flugslysi

Brasilísk farþegaþota neyddist til þess að lenda eftir að einn farþegi trylltist og réðist að ástæðulausu á flugmenn vélarinnar og setti alla farþegana í stórhættu. Samkvæmt AP fréttastofunni komst maðurinn inn í flugstjórnarklefann þar sem hann réðist án fyrirvara á flugmennina.

Flugvélin var á leið frá Uruguay til Sao Paolo í Brasilíu þegar maðurinn réðst á flugmennina.

Í árásinni sveigði farþegaþotan skarpt til hliðar en flugstjóranum tókst að hrópa á hjálp í kallkerfi vélarinnar. Þá um leið greip mikil skelfing um sig á meðal farþega. Flugfreyja fór til farþeganna og bað þá um að aðstoða sig við að yfirbuga manninn. Um tíu farþegar réðust þá á hinn tryllta mann sem veitti harða mótspyrnu.

Að lokum tókst farþegunum að yfirbuga manninn og binda hann fastan í sæti sínu. Tuttugu mínútum síðar lenti þotan á heilu og höldnu.

Talið er að árásarmaðurinn sé veikur á geði. Hann var fluttur á geðdeild eftir að vélin lenti.

Meðal farþega var iðnaðarráðherra Uruguay en hann var á leið til Kína. Hann lýsti meðal annars skelfingunni um borð í vélinni þegar hún sveigði skarpt til hliðar við árás mannsins.

Nokkrir farþegar slösuðust í átökunum við manninn, en þó enginn alvarlega.