35 skrímsli brutust inn til Lady Gaga þar sem hún var nakin

Tónlistarkonan, og Íslandsvinurinn, Lady Gaga, varð fyrir sérkennilegri reynslu á dögunum þegar hún ákvað að fara að sækja mat um miðja nótt, nakin.

Hún var stödd í húsi í Perú þar sem hún hélt tónleika á dögunum. Samkvæmt Sky fréttastöðinni heyrði hún einhver óhljóð koma úr bílskúrnum og ákvað að kanna eftirlitsmyndavélarnar. Kom þá í ljós að 35 lítil skrímsli, en það er það sem hún kallar aðdáendur sína (little monsters það er að segja), höfðu brotist inn í bílskúrinn og hreiðrað um sig þar.

Gaga örvænti ekki, heldur virtist hún pirraðri að missa svefn yfir þessu, allavega ef marka má twitter færslur hennar. Þar skrifaði hún meðal annars:

„#MONSTERFACT when gaga is asleep try to break into the garage, sing loud as possible, + ring the doorbell repeatedly #happening now #bad kids, (sic)."

Gaga sá aumur á aðdáendunum og vildi helst gefa þeim að borða, en af öryggisástæðum, og líklega velsæmisástæðum einnig, þá hleypti hún þeim ekki inn í húsið.

Daginn eftir hélt Gaga tónleika í Brasilíu, þá sendi hún öllum aðdáendum sínum fyrir utan hótelið þar sem hún gisti hamborgara og franskar. Hún sagðist svo elska þau innilega á Twitter síðu sinni.

Þess ber að geta að samkvæmt fréttum þá virðist Gaga ekki hafa kallað til lögreglu vegna innbrotsins.