Merkel efast um að samkomulag náist um fjárlög ESB

Angela Merkel kanslari Þýskalands efast um að samkomulag náist um fjárlög Evrópusambandsins á leiðtogafundi sambandsins sem nú stendur yfir í Brussel.

Fundinum var frestað í gærkvöldi fram til hádegis í dag meðan leiðtogarnir reyna að komast að samkomulagi.

Framkvæmdastjórn Evrópusambandsins vill að fjárlögin verði hækkuð um 4,8% frá því sem nú er. Þetta geta margir leiðtogar innan sambandsins ekki sætt sig við á meðan flestar ríkisstjórnir í Evrópu séu beðnar um að lækka eigin fjárlög vegna kreppunnar sem ríkir í Evrópu. Þeir vilja að ESB herði sultarólarnar og lækki fjárlög sín eins og aðrir.