Costa Allegra er komið til Seychelleseyja

Byrjað er að flytja farþega úr ítalska skemmtiferðaskipinu Costa Allegra í land á Seychelles eyjum.

Franskur togari kom með Costa Allegra í togi til bæjarins Victoria í nótt en þar er stærsta höfnin á eyjunum. Yfir 1.000 manns eru um borð í Costa Allegra og talið að það taki nokkra klukkutíma að flytja þá alla í land.

Eldsvoði olli alvarlegri vélarbilun í Costa Allegra sem missti allt afl um borð þar á meðal rafmagn. Farþegarnir hafa því lifað á matarpökkum sem þyrlur hafa fært til skipisins þá þrjá daga sem það hefur verið á leiðinni til Seychelles eyja.