Mottumars ýtt úr vör

Mottumars, árvekni og fjáröflunarátak Krabbameinsfélagsins var formlega ýtt úr vör í dag, þriðja árið í röð. Formaður félagsins segir átakið hafa náð vel til karla en markmiðið er að safna þrjátíu og fimm milljónum í mars.

Í mottumars eru karlmenn hvattir til að leggja rakvélarnar til hliðar og safna yfirvaraskeggi og styrktaráheitum til að vekja athygli á krabbameini hjá körlum. Úrvalslið slökkviliðs og lögreglu hófu átakið með keppni í sunknattleik þar sem lögreglumenn sigruðu annað árið í röð. Forstjóri krabbameinsfélagsins segir átakið hafi skilað miklum árangri.

„Karlmenn eiga núna miklu auðveldara með að tala um þessi mál og við heyrum það mjög mikið og konur og karlmenn eru þakklát fyrir það að umræðan er meiri og opnari en hún hefur verið," segir Ragnheiður Haraldsdóttir, forstjóri Krabbameinsfélags Íslands.

„Þetta er eitthvað sem við getum aldrei leikið eftir ríkisvaldið eða ráðuneytin þetta þarf að vera á þessum félagslega grunni og gera þetta svolítið skemmtilegt þó alvaran sé undirliggjandi," segir Guðbjartur Hannesson velferðarráðherra.