Fimmtíu þúsund flóttamenn í Tyrklandi

Tugþúsundir Sýrlendinga hafa flúið yfir landamærin til Tyrklands og annarra nágrannaríkja frá því stjórnarbylting hófst í Sýrlandi á síðasta ári. Yfirvöld í Tyrklandi áætla að rúmlega fimmtíu þúsund flóttamenn séu nú í landinu.

Erfiðlega hefur gengið að mæta þörfum flóttamanna og kvarta margir undan skorti á vatni og mat. Stór hluti flóttafólksins heldur nú til í Boynuyogun flóttamannabúðunum í Hatay-héraðinu í norðurhluta Tyrklands.

En í aðeins sjötíu og fimm kílómetra fjarlægð frá flóttamannabúðunum halda átökin áfram í Aleppo, fjölmennustu borg Sýrlands. Sem fyrr eru fregnir af stöðu mála í borginni óljósar en talið er að uppreisnarmenn reyni nú að berja aftur sókn öryggissveita sem ný ráða lögum og logum í hinu hernaðarlega mikilvæga Salah al-Din íbúðarhverfi í Aleppo.

Yfirvöld í Tyrklandi fylgjast náið með gangi mála í borginni. Fólksflótti úr Aleppo hefur verið með minna móti frá því að orrustan um borgina hófst. Tyrknesk stjórnvöld hafa þó gefið út að þau séu reiðubúin að skjóta skjóli yfir hundrað þúsund flóttamenn.

Hillary Clinton, utanríkisráðherra Bandaríkjanna, fundaði með ráðamönnum í Istanbúl í gær. Þar tilkynnti hún að yfirvöld í Bandaríkjunum myndu auka fjárveitingar sínar til Flóttamannastofnunar Sameinuðu Þjóðanna um 5.5 milljónir dollara. Er þetta gert vegna þeirra óvissu sem nú ríkir um sýrlenska flóttamenn.

Margir flóttamenn hafa þó gagnrýnt Clinton og bandarísk yfirvöld fyrir að styrkja ekki uppreisnarmenn með beinum hætti. Þörf sé á vopnum og orrustuþotum, ekki nokkrum milljónum dollara.