Vilja aðstoða uppreisnarmenn

Sýrlenski herinn hélt áfram þungum sprengjuárásum á íbúa borgarinnar Homs í gær, daginn eftir að Allsherjarþing Sameinuðu þjóðanna samþykkti harðorða ályktun þar sem krafist er afsagnar Bashars al-Assads Sýrlandsforseta.

Nicolas Sarkozy Frakklandsforseti og David Cameron, forsætisráðherra Bretlands, sögðu nauðsynlegt að uppreisnaröfl í Sýrlandi sameini krafta sína og alþjóðasamfélagið þurfi að hjálpa þeim að verjast stjórnarhernum.

„Við getum ekki komið á byltingu í Sýrlandi,“ sagði Sarkozy á fundi sínum með Cameron í París í gær, „ef byltingaröflin í Sýrlandi vinna ekki að því að sameina krafta sína og skipuleggja sig svo við getum veitt þeim betri aðstoð.“

Þeir hvetja Evrópusambandið til að samþykkja nýjar refsiaðgerðir gegn Sýrlandi fyrir næstu mánaðamót og lofa Sýrlendingum veglegri aðstoð ef Assad fer frá völdum.

Bæði Ban ki-Moon, framkvæmdastjóri Sameinuðu þjóðanna, og Nancy Pillay, mannréttindafulltrúi Sameinuðu þjóðanna, segja „nánast öruggt“ að framferði sýrlenskra stjórnvalda undanfarna mánuði megi kallast glæpir gegn mannkyni.- gb