Höfðu efasemdir um að Whitney væri sú rétta

Kevin Costner mótleikari Whitney Houston í Bodyguard hélt hjartnæma ræðu við útför hennar í dag. Hann sagði að framleiðendur myndarinnar hefðu upphaflega haft verulegar efasemdir um að Whitney væri rétta manneskjan í hlutverkið. Þá hefði alls ekki staðið til að lagið I will always love you væri í myndinni.

„Lagið I will always love you átti ekkert að vera í myndinni. Fyrsti kosturinn var What becomes of the broken hearted," sagði Kevin Costner. Hann sagði að þegar fólk safnaðist saman með brostin hjörtu til þess að kveðja Whitney væri öllum hollt að þerra tár sín og minnast þess hversu mikið kraftaverk Whitney hefði verið.

Kevin sagði að þau Whitney hefðu átt margt sameiginlegt. „Ég veit að mörg ykkar sitjið þarna og efist um þessa fullyrðingu mína. Hún er stelpa en þú ert strákur. Hún er svört en þú ert hvítur. Við höfðum heyrt af því að þér þætti gaman að syngja en Whitney kunni að syngja," sagði Kevin. Sannleikurinn væri hins vegar sá að þau ættu meira sameiginlegt en útlit var fyrir í fyrstu.

Kevin sagði að Whitney hefði verið á hátindi ferils síns sem söngkona þegar hann áttaði sig á því að hún væri fullkomin í aðalhlutverk myndarinnar Bodyguard. Margir hefðu aftur á móti haft efasemdir og sumir talið að heppilegra væri að fá reyndari leikkonu. Þá hefðu sumir haft efasemdir um hana af því að hún væri svört. Kevin sagðist hafa verið þessu ósammála. „Mér fannst hún vera fullkomin fyrir það sem við ætluðum að gera," sagði Kevin.

Ákvörðun var tekin um að Whitney myndi fara í prufur fyrir hlutverkið hjá kvikmyndaverinu og þar hefði hún hrifið alla sem fylgdust með. Því varð úr að hún fengi hlutverkið. „Whitney, það var ekki bara að þú værir nógu góð fyrir hlutverkið. Þú varst frábær. Þú gerðir myndina að því sem hún varð," sagði Kevin. Hann sagði að margir leikarar hefðu getað farið með aðalkarlhlutverkið í myndinni en Whitney væri eina manneskjan sem gat leikið Rachel Marron.