Öll heimsbyggðin mun geta fylgst með útför Whitney

Gert er ráð fyrir að öll veröldin muni geta fylgst með þegar Whitney Houston verður borin til grafar í dag klukkan fimm í dag að íslenskum tíma.

Um 1500 manns, fjölskylda og vinir verða viðstaddir útförina, en AP fréttastofan ætlar að sýna hana á Netinu. Á meðal þekkts fólks sem mun verða viðstatt útförina eru Bobby Brown, fyrrverandi eiginmaður hennar, Kevin Costner mótleikari hennar úr Bodyguard, Dionne Warwick, Alicia Keys og fleiri frægir.

Áður hafði verið greint frá því að fjölskylda söngkonunnar hefði tjáð Bobby Brown, fyrrum eiginmanni hennar, að ekki væri óskað eftir nærveru hans við jarðaför söngkonunnar, en samkvæmt frásögn Los Angeles Times er eins og breytingar hafi orðið þar á.