Rússar neita vopnaflutningum

Rússar segja að flugvél sem Tyrkir stöðvuðu á leið sinni frá Rússlandi til Sýrlands hafi ekki verið að flytja vopn. Löglegur ratsjárbúnaður hafi verið í vélinni. Tyrkir og Sýrlendingar hafa deilt um það hvað nákvæmlega var í vélinni, en Tyrkir segja að um einhvers konar varnarbúnað hafi verið að ræða.

Flugvélin var frá flugfélaginu Syrian Air, en tyrkneskar herþotur neyddu hana til að lenda í Ankara á miðvikudag. „Við erum ekki að leyna neinu,“ sagði Sergei Lavrov, utanríkisráðherra Rússlands, í gær. „Það voru auðvitað engin vopn í vélinni og hefðu ekki getað verið,“ sagði Lavrov.

Stjórnvöld í Sýrlandi þvertóku einnig fyrir að vopn hefðu verið um borð og skoruðu á tyrknesk stjórnvöld að sýna búnaðinn.

Þá tóku uppreisnarmenn í Sýrlandi yfir loftvarnarstöð í nágrenni borgarinnar Aleppo í gær. Harðir bardagar hafa geisað í Aleppo undanfarið. Myndbönd sem sett voru á netið í gær sýndu uppreisnarmenn inni í stöðinni að skoða eldflaugar. Talsmaður uppreisnarráðsins í Aleppo sagði að skömmu eftir að uppreisnarmennirnir hefðu náð stöðinni á sitt vald hefði stjórnarherinn hafið loftárásir á hana. Flestar eldflaugarnar og annar búnaður í stöðinni hefði verið eyðilagður.