Fundu átta tonn af kókaíni í bananasendingu

Lögreglan í Belgíu lagði hald á rúmlega átta tonn af kókaíni í banasendingu frá Ekvador. Um er að ræða eitt stærsta smyglmál síðari tíma í Evrópu.

Það var í byrjun vikunnar sem tollverðir og lögregla í hafnarborginni Antwerpen lögðu hald á efnin. Þau fundust í bananasendingu sem kom sjóleiðis frá Ekvador en áfangastaður þeirra var Rotterdam.

Saksóknari í Hollandi sagði í gær að rúmlega átta tonn af kókaíni hefðu verið í sendingunni og að efnin hefðu verið vandlega falin undir banönunum í rúmlega sjö þúsund pökkum. Er þetta stærsta smyglmál sem komið hefur upp í Hollandi.

Fjórir Hollendingar hafa verið handteknir vegna málsins sem og einn belgískur vörubílstjóri. Mennirnir voru með tölu leiddir fyrir dómara í Rotterdam í gær. Áætlað söluverðmæti efnanna er fimm hundruð milljónir evra eða það sem nemur áttatíu milljörðum íslenskra króna.

En jákvæða fleti má þó finna. Eftir að ávextirnir höfðu verið rannsakaðir var ákveðið að leyfa sendingunni að halda áfram til Rotterdam. Voru þeir fluttir í Blijdorp dýragarðinn þar sem apar og önnur dýr gæddu sér á þeim.