Mannkynið verður hægt og bítandi heimskara

Mannkynið er hægt og bítandi að glata vitsmuna- og tilfinningalegum hæfileikum sínum ef marka má nýlega rannsókn.

Niðurstöður rannsóknarinnar voru kynntar í bandaríska vísindatímaritinu Trends in Genetics af Dr. Gerald Crabtree, prófessor í þróunarlíffræði við Stanford-háskóla.

Í rannsóknarniðurstöðum Dr. Crabtree kemur fram að þróun hins siðmenntaða heims og þættir á borð við landbúnað og borgamyndun hafi dregið úr vægi gáfna þegar kemur að náttúruvali. Crabtree telur í raun að gáfnafar hafi verið ráðandi eiginleiki þegar samskipti mannsins byggðu ekki á töluðu máli.

Það eru þó fleiri þættir að baki en valið sjálft. Crabtree bendir á að nýlegar rannsóknarnir á erfðavísum sýni fram á að þau gen sem talin eru viðriðin gáfnafari og heilastarfsemi séu afar viðkvæm fyrir stökkbreytingu. Rannsóknir hans gefi til kynna að stór hluti mannkyns hafi í raun orðið fyrir tveimur eða fleiri stökkbreytingum sem leiði til minni heilastarfsemi.

Í niðurlagi bendir Crabtree engu að síður á að það séu á bilinu 2.000 til 5.000 gen sem komi að heilavirkni. Hin svokallað „heimskun" mannkyns sé því komin skammt á veg.

Þá segir Crabtree að bjargræði mannkyns felist í framförum í lífvísindum og erfðafræðilegri forritun.

Hægt er að nálgast rannsóknina hér.