Veigar Páll ósáttur við stöðu sína hjá Vålerenga

Veigar Páll Gunnarsson er ekki sáttur við stöðu sína hjá norska úrvalsdeildarliðinu Vålerenga í Osló. Landsliðsmaðurinn var í byrjunarliðinu gegn sínu gamla félagi Stabæk í gær en honum var skipt útaf í hálfleik. Veigar sagði við norska fjölmiðla eftir leikinn að hann væri mjög ósáttur við stöðu sína hjá félaginu.

„Ég hef ekki hugmynd um hvað ég á að gera, þetta getur allavega ekki haldið svona áfram," sagði Veigar í sjónvarpsviðtali við NRK. Hann hefur aðeins leikið sex leiki á tímabilinu og í þremur þeirra hefur honum verið skipt útaf í hálfleik. Og í aðeins einum þeirra hefur hann leikið allar 90 mínúturnar.

„Ég er mjög svekktur. Þegar ég kom hingað hafði ég skorað 9 mörk og gefið 5 stoðsendingar í 15 leikjum með Stabæk. Frá því ég kom til Vålerenga hefur verið meira fjallað um líkamsþyngd mína og eitthvað slíkt bull. Mér finnst ég ekki fá að vera ég sjálfur. Ég er þannig leikmaður að ég verð að fá að spila sem mest. Ég hef ekki fengið tækifæri til þess og sjálfstraustið er ekki mikið. Þjálfarinn hefur gert þetta áður og ég held ég hafi ekki geti ekki haldið þessu áfram," sagði Veigar m.a. í viðtalinu.

Martin Andresen þjálfari Vålerenga segir að þeir sem hafi séð fyrri hálfleikinn ættu að skilja afhverju Veigar var ekki með í þeim síðari.

Veigar, sem er 32 ára gamall, á tvö ár eftir af samningi sínum við félagið og hann segist ekki vita hvort hann verði áfram í herbúðum Vålerenga.