Hundruð manna mótmæla

Jafnt kaþólskir íbúar Norður-Írlands sem mótmælendur tóku þátt í mótmælum í Belfast í gær gegn fyrstu fóstureyðingarstofunni sem opnuð er á Írlandi.

Á stofunni stendur konum til boða að fá fóstureyðingarpillur ef meðganga er ekki komin lengra en á níundu viku. Þetta verður þó aðeins heimilt ef læknir telur að þungun þeirra stofni framtíðarheilsu þeirra eða lífi í hættu. Á Írlandi og Norður-Írlandi heimila lög einungis fóstureyðingar að þessum skilyrðum uppfylltum.

Fjölmargir Írar og Norður-Írar eru hins vegar algerlega andvígir fóstureyðingum, jafnvel þegar svo stendur á að líf eða framtíðarheilsa móðurinnar sé í hættu.

Um tvö hundruð manns mættu því til að mótmæla opnun stofunnar í gær, þeirrar fyrstu sem opnuð er á gjörvallri eyjunni.

Þeir sveifluðu spjöldum þar sem á stóð „Höldum Írlandi fóstureyðingalausu“.

Þá sá John Larkin, aðalsaksóknari Norður-Írlands, ástæðu til að skrifa þingmönnum, sem flestir eru andvígir fóstureyðingum, bréf þar sem hann bauð fram aðstoð sína ef þeir sæju ástæðu til að rannsaka starfsemi stofunnar.

Hann tók þó fram að hann gæti ekki gefið fyrirmæli um að stofunni verði lokað nema vísbendingar komi um að „alvarlegir glæpir“ séu framdir þar.- gb