Mikilvægt fólk fær ekki að fara frá Kúbu

Íbúar á Kúbu geta brátt ferðast úr landi án þess að þurfa að fá sérstaka brottfararheimild frá stjórnvöldum og greiða fyrir háa upphæð. Kúbustjórn tilkynnti um þetta í ríkisdagblaðinu Granma og sagði nýja fyrirkomulagið taka gildi 14. janúar.

Þá fá þeir sem fara úr landi heimild til að dvelja í tvö ár í útlandinu, en áður höfðu þeir ellefu mánaða frest til að snúa aftur áður en þeir yrðu sviptir ríkisborgararétti á Kúbu. Þá var einnig skýrt frá því að ríkið áskildi sér áfram rétt til þess að „verja sig gegn íhlutunar- og niðurrifsáformum Bandaríkjastjórnar og bandamanna hennar. Af þeim sökum verða áfram í gildi þær ráðstafanir sem miða að því að vernda þann mannauð sem byltingin skapaði gegn hæfileikaþjófnaði voldugra ríkja.“

Þarna er átt við reglur um að læknar, vísindamenn, hermenn og aðrir sem teljast sérlega mikilvægir einstaklingar í samfélaginu fái ekki fararleyfi, þrátt fyrir nýju reglurnar.

Breytingarnar eru sagðar gerðar til þess að koma betur til móts við Kúbumenn, sem fluttir eru af landi brott. Um milljón Kúbumenn búa í Bandaríkjunum og nokkur hundruð þúsund í Evrópuríkjum. - gb