Norðmenn vilja Stoltenberg áfram

Meirihluti almennings í Noregi vill ekki að Jens Stoltenberg, forsætisráðherra landsins, segi af sér embætti, þrátt fyrir að stjórnvöld í landinu hafi beðið mikinn álitshnekki eftir að sannleiksskýrsla um fjöldamorðin í Osló og Útey kom út í fyrradag.

Þetta sýnir ný skoðanakönnun sem gerð var í fyrradag og norska ríkisútvarpið sagði frá í gærkvöld. Samkvæmt henni segja rétt rúmlega 70% að Stoltenberg eigi ekki að segja af sér. Rúm 20% telja hins vegar að hann eigi að gera það. Um 6% hafa ekki mótað sér skoðun á málinu.

Í sannleiksskýrslunni segir að norsk yfirvöld og lögreglan hafi brugðist daginn sem árásin varð. Leiðarahöfundur Verdens Gang sagði í gær að Stoltenberg yrði að segja af sér.