Arnar Grétarsson: Væri mikil viðurkenning fyrir mig að fá starfið

Arnar Grétarsson er einn þriggja sem koma til greina sem yfirmaður knattspyrnumála hjá belgíska félaginu Club Brugge.

Arnar staðfesti þetta í samtali við útvarpsþáttinn Fótbolti.net á X-inu 977 í hádeginu í dag.

„Starfið og klúbburinn eru gríðarlega spenanndi. Bara að vera orðaður við félagið er mikill heiður. Vonandi gengur það eftir," sagði Arnar.

„Eins og framkvæmdastjóri félagsins lét hafa eftir sér í gær eða fyrradag eru þrír kandídatar til skoðunar. Ég væri einn af þeim og kæmi sterklega til greina. Þeim litist virkilega vel á mig," sagði Arnar.

Reiknað hafði verið með því að belgíska félagið tæki ákvörðun varðandi ráðninguna í gær en svo fór ekki.

„Ef þetta kæmi til liti ég á það sem mikla viðurkenningu fyrir mína frammistöðu sem knattspyrnumaður og í þessari stöðu í Grikklandi að fá tækifæri á þessu stigi."

Arnar gegndi sömu stöðu hjá gríska félaginu AEK í Aþenu í tvö ár eða allt þar til í sumar þegar allt fór í háaloft hjá félaginu vegna fjárhagserfiðleika. Á þeim tíma sem Arnar stýrði gangi mála hjá AEK gengu Elfar Freyr Helgason og Eiður Smári Guðjohnsen í raðir félagsins.

Arnar þekkir vel til í Belgíu. Þar spilaði hann með Lokeren árin 2000-2006 við afar góðan orðstír. Club Brugge situr í 3.-5. sæti belgísku deildarinnar með 35 stig eftir 20 umferðir.