Hlín inn fyrir Soffíu

Sigurður Ragnar Eyjólfsson, þjálfari A-landsliðs kvenna í knattspyrnu, hefur þurft að gera enn eina breytingu á hóp sínum sem mætir Ungverjum á Laugardalsvellinum á morgun.

Soffía Gunnarsdóttir, leikmaður Stjörnunnar, er meidd og í hennar stað kemur Hlín Gunnlaugsdóttir, leikmaður Breiðabliks.

Hlín er 23 ára og á að baki 20 landsleiki fyrir u-19 ára lið Íslands. Hún á hins vegar enn eftir að leika sinn fyrsta leik fyrir A-liðið.

Soffía er fjórði leikmaðurinn sem verður að draga sig út úr upphaflega hópnum en Guðbjörg Gunnarsdóttir, Hallbera Guðný Gísladóttir og Katrín Ásbjörnsdóttir eru einnig fjarri góðu gamni vegna meiðsla.