Svíar gagnrýna Madeleine prinsessu harðlega fyrir lífsstíl sinn

Þótt margir Svíar gleðjist yfir trúlofun Madeleine prinsessu og bandarísks kærasta hennar hefur trúlofunin einnig endurvakið harða gagnrýni sem Madeleine hefur sætt í Svíþjóð vegna lífsstíls síns.

Madeleine ákvað að flytjast til New York fyrir tveimur árum síðan og hefur lítið látið sjá sig í Svíþjóð frá þeim tíma. Gagnrýni Svía gengur út á að Madeleine hafi mun meiri áhuga á að taka þátt í ljúfu lífi og veislum þotuliðsins á Manhattan en að sinna skyldum sínum sem prinsessa í Svíþjóð.

Svíar hafa kallað þessa prinsessu sína lata, ofdekraða og skemmtanasjúka. Í frétt um málið í blaðinu BT er haft eftir sérfræðingi í evrópskum konungsfjölskyldum að Madeleine og Chris O´Neill verðandi eiginmaður hennar verði að stíga varlega til jarðar í Svíþjóð ef prinsessan á að endurheimta vinsældir sínar.

Þá hefur komið fram að Karl Gustav Svíakonungur hafi látið bandarísku alríkislögregluna FBI kanna með leynd feril O´Neill sem er sterkefnaður athafnamaður í New York. Ekkert gruggugt kom fram í þeirri rannsókn og raunar segir Sylvia drottning að O´Neill sé draumur hverrar tengdamóður.