Mikið manntjón í Afganistan

Árásarmaður, klæddur lögreglubúningi, sprengdi sig í loft upp í mosku í norðvesturhluta Afganistan fyrr í dag.

Að minnsta kosti 41 fórust í tilræðinu, þar á meðal fimm börn. Þá liggja rúmlega fimmtíu sárir eftir, nokkrir lífshættulega slasaðir. Hátt í tuttugu liðsmenn afgönsku lögreglunnar létust í árásinni.

Nokkrir háttsettir ráðamenn voru í bænahúsinu þegar atvikið átti sér stað. Samkvæmt upplýsingum frá héraðsstjórninni í Faryab sluppu embættismennirnir ómeiddir.

Enginn hefur lýst yfir ábyrgð á árásinni en grunur leikur á að talibanar hafi verið þar að verki.

Fólkið var samankomið í moskunni til fagna upphafi Eid al-Adha fórnarhátíðarinnar en það er ein helsta trúarhátíð múslíma.

Hátíðin stendur í fjóra daga. Á þessum tíma minnast múslímar þess þegar guð gaf Abraham hrút til fórna í stað sonar síns, Ísmaels.