Hjónavígslum hefur snarfækkað í Danmörku

Hjónavígslum hefur snarfækkað í Danmörku á undanförnum árum. Raunar hafa þær ekki verið færri síðan árið 1983.

Í nýjum tölum um hjónavígslur frá dönsku hagstofunni kemur fram að þeim fækkaði um 27% frá árinu 2008 og þar til í fyrra. Fækkunin er jafnmikil í öllum aldurshópum yfir tvítugu.

Í fyrra játuðust rúmlega 27 þúsund pör hvort öðru í Danmörku, annaðhvort í borgaralegri vígslu eða í kirkjubrúðkaupi. Árið 2008 létu hinsvegar hátt í 40.000 dönsk pör pússa sig saman.

Einn dagur skar sig þó úr í fyrra hvað fjölda brúðkaupa varðaði. Það var ellefti nóvember, eða 11.11.11. en þann dag létu rúmlega 1.000 pör gefa sig saman.

Fram kemur í tölum hagstofunnar að annars sé vorið og sumarið sá tími sem Danir ganga í hjónaband en yfir helmingur af öllum hjónavígslum í landinu fer fram á tímabilinu frá maí og fram í ágúst.