Klasasprengju varpað á leikvöll - Tíu börn létust

Tíu börn létust í Sýrlandi í dag þegar herþota stjórnarhersins varpaði klasasprengju á litinn leikvöll í þorpinu, Deir al-Asafir, rétt austan við höfuðborgina Damaskus.

Þetta staðhæfa uppreisnarmenn en þeir birtu myndband sem sýnir bæði lík barnanna sem og þá gríðarlegu eyðileggingu sem hlaust af sprengingunni.

Talið er að MiG herþota hafi varpað sprengjunni.

Ekkert lát er á átökum í og við Damaskus. Uppreisnarmenn hertóku bækistöð stjórnarhersins við höfuðborgina í gær.

Í myndbandi uppreisnarmanna má meðal annars sjá lík tveggja ungra stúlkna sem létust í sprengingunni.

Yfirvöld í Sýrlandi hafa ítrekað verið sökuð um að beita klasasprengjum gegn uppreisnarmönnum. Þeim ásökunum hefur þó verið hafnað.

Klasasprengjur eru vopnategund sem inniheldur margar smásprengjur sem hægt er að dreifa yfir stór svæði. Margar þeirra springa ekki og geta skaðað almenna borgara mörgum árum eftir að átökum lýkur.

Samkvæmt upplýsingum frá utanríkisráðuneytinu eiga yfir 70 ríki klasasprengjur en 34 ríki framleiða slík vopn.