Uppátækjasöm dóttir vekur heimsathygli

Ljósmynd sem tekin var af hinni 22 ára gömlu Samönthu Busch við Miklagljúfur í Bandaríkjunum fer nú sem eldur um sinu á veraldarvefnum.

Samantha fékk kærasta sinn til að taka myndina en á henni virðist hún vera að falla í gljúfrið. Staðreyndin er sú að Samantha stendur á syllu.

„Mamma var áhyggjufull yfir ferðalaginu í Miklagljúfur. Ég sendi henni þessa mynd," skrifaði Samantha á vefsíðunni Reddit þar sem myndin birtist fyrst.

Þetta gerði Samantha til að kenna móður sinni lexíu. Svo virðist sem að henni hafi heppnast ætlunarverk sitt.

Í samtali við fréttastofu ABC sagði móðir Samönthu að henni hafi verið afar brugðið þegar hún sá myndina fyrst. Hún hefur þó fyrirgefið dóttur sinni.

Ljósmyndin hefur vakið gríðarlega athygli og hafa þúsundir skoðað hana frá því að hún birtist fyrst á internetinu.