Munu dvelja í eitt ár í ISS

Geimferðastofnun Bandaríkjanna, NASA, hyggst brjóta blað í sögu geimvísindanna árið 2015 en þá munu tveir geimfarar hefja tólf mánaða dvöl sína í Alþjóðlegu geimstöðinni, ISS.

Bandaríkjamaðurinn Scott Kelly og rússneski geimfarinn Míkhail Korníenkó munu sinna hefðbundnum rannsóknarstörfum í geimstöðinni en samhliða þeim verður líkamleg og andleg líðan þeirra könnuð.

Verkefnaáætlun NASA gerir ráð fyrir nokkrum löngum geimferðum á næstu árum og því þykir nauðsynlegt að rannsaka áhrif slíkra verkefna á mannslíkamann.

NASA stefnir meðal annars á að lenda á fjarlægu smástirni fyrir árið 2025. Þá er sem fyrr lögð áhersla á að heimsækja Mars á einhverjum tímapunkti.

Kelly, sem er 48 ára gamall, er reyndur flugmaður hjá bandaríska sjóhernum en hann hefur einnig stýrt nokkrum geimferðum. Korníenkó er 52 ára gamall. Um árabil gegndi hann herþjónustu í Rússlandi og var á tíma fallhlífahermaður. Hann gekk til liðs við geimvísindastofnun Rússlands árið 1998.

Félögunum verður skotið á loft á vormánuðum 2015 og lenda að einu ári liðnu.

En þó svo að verkefnið sé sannarlega metnaðarfullt þá er ekki um heimsmet að ræða. Rússneski geimfarinn Valerí Polýakov hafði aðsetur í geimstöðinni Mír í 438 daga um miðjan tíunda áratuginn.