Ódauðleiki innan seilingar

Þar til nýlega töldu flestir ómögulegt að lengja líf manneskjunnar eitthvað umfram eitt hundrað ár. Nú þykjast vísindamenn hins vegar vissir um að ódauðleiki - eða eitthvað í þá veruna - sé rétt handan við hornið.

Einhverjir vísindamenn telja jafnvel inni í myndinni að núlifandi fólk gæti notið góðs af væntanlegum uppgötvunum sínum og orðið ódauðlegt innan nokkurra áratuga.

„Ég held það verði engin takmörk fyrir því hvað fólk getur lifað lengi," segir Aubrey de Grey, sérfræðingur sem rannsakar ódauðleika, í viðtali við blaðamann Today.com. Hann hefur uppgötvað ensím í bakteríum sem virðist koma í veg fyrir að þær deyi. Hann vonast til þess að sama tækni virki á frumur mannsins.

Annar vísindamaður, Bill Andrews, hefur uppgötvað aðra tækni sem hann telur koma í veg fyrir hrörnun með aldrinum. Hún gengur í stórum dráttum út á að koma í veg fyrir að ákveðnir hlutar frumna minnki með tímanum. Með því móti mætti líklega koma í veg fyrir öldrun og ef hægt væri að stækka hlutana mætti jafnvel snúa ferlinu við.

Menn eru ekki á einu máli um hvort hægt sé að koma í veg fyrir hrörnun með ofangreindum aðferðum en þeir sem trúa því á annað borð eru mjög ákafir og telja að þess verði ekki langt að bíða að mannkynið hreinlega öðlist ódauðleika.