Alfreð skoraði í tapleik

Alfreð Finnbogason heldur áfram að skora fyrir Heerenveen í hollensku úrvalsdeildinni í fótbolta. Alfreð skoraði úr vítaspyrnu í 3-1 tapi gegn Utrecht á útivelli í dag.

Utrecht gerði nánast út um leikinn með tveimur mörkum á þremur mínútum um miðbik seinni hálfleiks. Leon de Kogel skoraði bæði mörkin en hið seinna kom upp úr vítaspyrnu sem dæmd var Alfreð sem handlék knöttinn inni í vítateig.

Alfreð minnkaði muninn í 2-1 á 78. mínútu þegar hann vippaði í mitt markið af vítapunktinum en nær komst Heerenveen ekki og Jacob Mulenga gerði út um leikinn á 89. mínútu.

Vandræði Heerenveen halda því áfram en liðið hefur aðeins náð í 2 stig í sex síðusu leikjum sínum. Heerenveen er stigi fyrir ofan fallsvæðið með 15 stig en Utrecht er komið í 29 stig í 6. sæti deildarinnar.

Alfreð lék allan leikinn að vanda og hefur nú skorað 13 mörk í 15 leikjum fyrir hollenska liðið. Hann nældi sér að auki í gult spjald á 59. mínútu leiksins.