Hver var Adam Lanza?

Þeir sem þekktu Adam Lanza, drenginn sem réðist inn í grunnskóla í Bandaríkjunum á föstudaginn var og skaut þar 26 manns, þekktu hann sem feiminn, innhverfan pilt sem aldrei hafði komist í kast við lögin. Þeir eiga erfitt með að sjá hann fyrir sér sem kaldrifjaða morðingja.

Á föstudaginn byrjaði Adam Lanza á því að drepa móður sína á heimili þeirra áður en hann réðist inn í skólann þar sem hann drap tuttugu börn og sex fullorðna áður en hann svipti sjálfan sig lífi með byssum sem allar voru í eigu móður hans. Lögregla hefur ekki áttað sig á mögulegum ástæðum þess að Lanza réðist inn í skólann.

Fréttastofa CNN varpaði nokkru ljósi á líf Lanza fyrr í dag.

Lanza hafði áhuga á fótbolta, hjólabrettum og tölvuleikjum þegar hann var ungur. Þegar hann var 17 ára skildu foreldrar hans. Að öðru leyti eru ekki miklar opinberar upplýsingar um Lanza fyrir hendi, en hann var með hreint sakarvottorð og hafði aldrei komist í kast við lögin.

Sem barn var hann hlédrægur og ljúfur strákur en lítill námsmaður, að sögn frænku hans. „Hann var án vafa erfiðasta barnið í fjölskyldunni, en lenti aldrei í neinu klandri," sagði hún. Á einhverju tímabili stóð móðir hans í deilum við skólayfirvöld sem enduðu á því að Lanza hætti í skóla og var kennt heima.

Það var mikið áfall fyrir bekkjarfélaga hans að frétta af voðaverkum Lanza. Þeir bera honum vel söguna, segja hann hafa verið hlédrægan og einrænan.

Einn bekkjarfélagi segir: „Maður fann strax að hann var snillingur."

Aðrir bekkjarfélagar bjuggust engan vegin við því að hann gæti gert eitthvað þessu líkt. „Hann var bara barn, ekki illmenni," segir fyrrum skólafélagi.

Faðir Lanza var einnig orðlaus eftir að hann heyrði af ódæðisverkunum. Hann sagði að hugur hans væri hjá fjölskyldum fórnarlambanna. Hann hafði engar skýringar á hegðan Lanza. „Við syrgjum ásamt öllum þeim sem hafa orðið fyrir þessum harmleik. Það er ekki hægt að lýsa því hvernig okkur líður. Við erum að leita að þeim skýringum sem okkur dettur í hug."