Dallas-stjarna látin

Bandaríski leikarinn Larry Hagman lést í gær 81 árs að aldri en hann er hvað þekktastur fyrir að hafa leikið JR Ewing í bandarísku sjónvarpsþáttunum Dallas.

Í rúm tíu ár á áttunda og níunda áratug síðustu aldar var Hagman vikulegur gestur á sjónvarpsskjám landsmanna í þáttunum um olíufjölskylduna í Dallas. Persóna Hagmans, JR Ewing var maðurinn sem allir elskuðu að hata og fylgdust menn hugfangnir með klækjabrögðum hans.

Hagman þjáðist af krabbameini í lifur og lést hann á sjúkrahúsi síðdegis í gær að því er fram kemur í tilkynningu frá fjölskyldu hans. Þrátt fyrir að JR hafi farið afar illa með eiginkonu sína í Dallas þáttunum, hina drykkfelldu Sue Ellen, var Linda Gray, sem lék hina þjáðu eiginkonu, afar góð vinkona Hagmans og var hún við hlið hans þegar hann gaf upp öndina.

Dallas þættirnir eiga fáa sína líka í sjónvarpssögunni en þegar mest lét fylgdust um 300 milljónir manna  í 57 löndum með þáttunum sem gengu í þrettán ár.

Þeir voru síðan endurvaktir á síðasta ári og þá snéri Hagman aftur í sínu þekktasta hlutverki. Stetson kúrekahatturinn varð að vörumerki JR og sjálfur átti Hagman rúmlega tvöþúsund slíka að eigin sögn. JR var nokkuð drykkfeldur og Hagman var það líka.

Í ævisögu sinni lýsir hann því hvernig hann á tímabili hafi drukkið fimm kampavínsflöskur á hverjum einasta degi um margra ára skeið. Enda fór svo að hann þurfti í lifrarígræðslu árið 1995.

Hann hélt þó áfram að drekka í laumi fram til ársins 2003.