Beckham hættir í bandaríska boltanum

David Beckham og félagar í Los Angeles Galaxy eru annað árið í röð komnir í úrslitaleikinn í bandarísku atvinnumannadeildinni í fótbolta en Beckham tilkynnti í gær að úrslitaleikurinn yrði síðasti leikur hans fyrir Galaxy-liðið.

Los Angeles Galaxy mætir Houston Dynamo í úrslitaleiknum 1. desember næstkomandi og hefur titil að verja. Beckham kom til LA Galaxy frá Real Madrid árið 2007 og liðið hefur unnið Vesturdeildina þrisvar sinnum og svo MLS-titilinn í fyrra.

Beckham er orðinn 37 ára gamall en hann er ekki tilbúinn að leggja skóna á hilluna og nú keppast breskir fjölmiðlar við að giska á hvað verði síðasta félag Beckham á ferlinum.

Það er samt búist við að Beckham endi ferillinn í Ástralíu en fimm félög hafa áhuga á kappanum og bítast nú um að bjóða honum besta samninginn.

Beckham talaði um það að hann stefni á að koma að MLS-deildinni í framtíðinni og þá sem eigandi en hann hefur örugglega átt stóran þátt að auka áhuga á deildinni í Bandaríkjunum.