Sérsveit nær góðum árangri gegn fíkniefnasölum í Kristjaníu

Sérsveit lögreglunnar í Kaupmannahöfn, sem sett var á laggirnar í byrjun september, til höfuðs fíkniefnasölunni í Kristjaníu, hefur náð umtalsverðum árangri í baráttu sinni við fíkniefnasalana.

Í frétt um málið í Politiken segir að sérsveitin, sem gengur undir nafninu Task Force Pusherstreet, hafi á þessum tíma lagt hald á 340 kíló af hassi og tæplega 14 kíló af marijúana. Götuverðmæti þessara fíkniefna er rúmlega 18 milljónir danskra króna eða tæplega 400 milljónir króna.

Tíu manns hafa sætt gæsluvarðhaldi í þessum aðgerðum sérsveitarinnar og 146 einstaklingar hafa fengið sektir fyrir fíkniefnaakstur í grennd við Kristjaníu. Þá hefur sérsveitin rannsakað 26 mál um brot á vopnalöggjöf landsins.

Morten Bödskov dómsmálaráðherra Danmerkur er ánægður með þennan árangur Task Force Pusherstreet.

Í tilkynningu segir ráðherrann að þessar nýju áherslur í baráttunni gegn fíkniefnasölunni séu greinilega að bera árangur og að áfram verði haldið á sömu braut og þá sérstaklega gegn höfuðpaurum fíkniefnasölunnar.