Bandaríkjaher ætlaði að varpa atómsprengju á Tunglið

Háttsettir ráðamenn í bandaríska hernum lögðu á ráðin um að sprengja upp tunglið með atómsprengju þegar Kalda stríðið og geimkapphlaupið stóð sem hæst.

Breskir og Bandarískir fjölmiðlar hafa fjallað um málið í dag en í umfjöllun þeirra er vísað til gagna frá árinu 1957, sem hingað til hefur verið haldið leyndum.

Verkefnið var kallað A119 eða A Study of Lunar Research Flights. Tilraunir Bandaríkjahers á þessum tíma snérust að stórum hluta til um vetnissprengjur. Vegna þyngdar var útilokað skjóta slíku vopni í átt að tunglinu og því varð atómsprengjan fyrir valinu.

Tilurð þessa undarlega verkefnis má rekja til forskots Rússa í geimkapphlaupinu. Þeim tókst að skjóta Spútnik á sporbraut um jörðu árið 1957. Vonast var til að sprengingin á yfirborði Tunglsins myndi skjóta Rússum skelk í bringu.

Fjölmargir þekktir vísindamenn á vegum Bandaríkjahers komu að rannsóknarvinnunni. Þar á meðal var einn þekktasti stjörnufræðingur samtímans, Carl Sagan, en hann vann að útreikningum fyrir geimskotið.

Stjórnendur verkefnisins ákváðu síðar meir að binda enda á verkefnið, enda þótti með öllu óvist hvaða áhrif sprengingin myndi hafa á Jörðina.

Í stað þess að sprengja tunglið í loft upp var lögð áhersla að heimsækja þetta nálægasta fyrirbæri himinsins. Bandaríkjamenn unnu á endanum geimkapphlaupið þegar tunglfarinn Neil Armstrong gekk fystur manna á yfirborði Tunglsins.