Obama ætlar að vinna kosningar með Facebook

Facebook mun skipta sköpum í kosningabaráttu Baracks Obama, forseta Bandaríkjanna, í forsetakosningum sem fram fara síðar á þessu ári. Kerfisfræðingar á vegum kosningastjórnar Obama eru nú að byggja umfangsmikinn gagnagrunn sem virkar þannig að hægt verður að safna upplýsingum um milljónir kjósenda í gegnum Facebook. Þannig býst kosningastjórnin við því að hægt verði að ná til kjósenda eftir leiðum sem hafa ekki verið farnar áður.

Samkvæmt frásögn um málið á vef Guardina búast tölfræðingar við því að þetta verði fyrsta kosningarbaráttan í Bandaríkjunum þar sem Facebook er aðaláróðurstækið. Blaðið bendir á að Facebook hafi stækkað gríðarlega frá síðustu kosningum og það skipti sköpum.

Þá er bent á að á Facebook megi finna hafsjó af mikilvægum upplýsingum um kjósendur. Kjósendum verður boðið að skrá sig inn á kosningasíðu í gegnum Facebook og þannig geti kosningastjórnin fengið persónuupplýsingar um facebooknotendur og fært þær yfir i miðlægan gagnagrunn. Sá gagnagrunnur gæti orðið sá stærsti og nákvæmasti sem notaður hefur verið í kosningabaráttu fram að þessu.