Stuðningsmenn Romney gætu verið í hættu

Hætta getur stafað af hitabeltisstorminum Isaac, sem nú er að myndast á karabískahafinu, fyrir Flórída-ríki í Bandaríkjunum í næstu viku. Samkvæmt mælingum veðurfræðinga verður stormurinn orðinn að fellibyl á næstu dögum.

Tölvuútreikingar gera ráð fyrir að fellibylurinn gæti gengið yfir Flórída strax á sunnudag.

Almannavarnir í landinu fylgjast grannt með gangi mála því á mánudag munu þúsundir meðlima Repúblikanaflokksins safnast saman í borginni Tampa í Flórída þar sem forsetaframbjóðandinn Mitt Romney heldur ræðu fyrir stuðningsmenn sína.