Sjónskertir ósáttir við arkitektatyppin og auglýsingaskiltin

Þrjár sjónskertar stúlkur eyddu sumrinu í að taka út aðgengismál fatlaðra og blindra að Laugaveginum í Reykjavík. Í nýlegri skýrslu sem stúlkurnar birtu fyrir hönd Blindrafélagsins kemur fram að þrjú atriði hafi truflað stúlkurnar mest á ferðum sínum niður Laugaveginn, það voru auglýsingaskilti sem stóðu á miðjum gangstéttum, þröskuldar og tröppur inn í verslanir og veitingastaði og litlir staurar sem standa víða upp úr gangstéttinni á Laugaveginum.

Sumargatan

Stúlkurnar voru sérlega ánægðar með þann hluta Laugavegsins sem lokaður var fyrir bílaumferð í sumar. „Það skapar meira pláss fyrir fatlað fólk og almenna borgara til að komast leiðar sinnar og mun afslappaðra er að ganga þegar ekki þarf að passa sig á bílum," segja þær í skýrslunni.

Stúlkurnar vilja að auglýsingaskiltin séu fjarlægð af gangstéttum við götuna. Þær telja að skiltin séu ekki lögleg, enda stangist þau við ákvæði í reglugerð frá árinu 1997. „Það er auðvelt fyrir blint og sjónskert fólk að hrasa um þau," segja þær í skýrslunni.

Umferðarljós og tröppur

Hljóðmerki á umferðarljósum voru annað hvort ekki til staðar eða hljóðið of lágt stillt í mörgum tilvikum. Í þeim tilvikum eiga sjónskertir erfitt með að fara yfir götur án hjálpar. Stúlkurnar vilja að hljóðmerkin séu hækkuð.

Stúlkurnar ráku sig oft á tröppur sem lágu upp á veitingastaði eða búðir. „Tröppur hindra fólk með sérþarfir, svo sem hjólastóla og göngugrindur, og geta reynst blindum og sjónskertum hættulegar," segir í skýrslunni. Þær leggja til að settir verði rampar eða lyftur eða gangstéttin sjálf hækkuð svo hjólastólar komist inn.

Arkitektatyppin

Við Laugaveginn eru margar útgáfur af stólpum sem stúlkurnar kalla „arkitektatyppi". Þessi typpi eru hættuleg blindu og sjónskertu fólki. Stúlkurnar vilja að typpin séu lituð í skærum litum og að samræmi verði á milli þeirra, þ.e. þau séu ekki misjafnlega stór og sver.

Úttektin var unnin þannig að farið var í fjórar vettvangsferðir og aðgengi kannað frá Hlemmi niður á Ingólfstorg. Gengið var báðum megin á gangstéttinni. „Það er von okkar að þessi skýrsla verði til þess að Reykjavíkurborg, verslunareigendur og aðrir hlutaðeigandi aðilar taki höndum saman og bæti aðgengi þannig að allir komist leiða sinna í miðborg Reykjavíkur án teljandi vandræða," segir í inngangi skýrslunnar.