Madeline prjónaði sex þúsund ungbarnahúfur

Hin 89 ára gamla Madeline Umhoefer er orðin að hálfgerðri goðsögn í heimabæ sínum í Bandaríkjunum. Hún var á unglingsaldri þegar hún lærði að prjóna. Síðan þá hefur hún prjónað ungbarnahúfur af miklum móð.

„Við höfum verið að fá húfurnar í áraraðir," sagði Nicole Bennett, stjórnandi nýburadeildar Bergen Merzy sjúkrahússins í Omaha. „Ég hef ávallt staðið í þeirri trú að húfurnar kæmu frá samtökum og stuðningshópum."

Það var síðan fyrir nokkrum vikum sem Bennett komst að því að ein manneskja hefði prjónað hverja einustu ungbarnahúfu sem borist hefur deildinni.

„Hvert eitt og einasta barn sem kemur í heiminn hjá okkur hefur fengið húfur frá Madeline," sagði Bennett.

Þetta þýðir að Madeline hefur prjónað og gefið spítalanum rúmleg sex þúsund ungbarnahúfur. Og húfurnar eru ekki af verri endanum því hver og ein er einstök. Madeline hefur jafnvel spunnið sitt eigið garn. Allt í allt hafa 174 kílómetrar af garni farið í húfurnar.

„Það tekur rúmlega tvær klukkustundir að prjóna eina húfu," sagði Madeline í samtali við AP fréttaveituna. „Ætli ég hafi ekki eytt rúmlega 15 þúsund klukkustundum í þetta allt saman."

Ungbarnahúfurnar hafa svo sannarlega komið að góðum notum á Bergen Mercy sjúkrahúsinu. Ásamt því að vera hjartnæmu minjagripur fyrir nýbakaða foreldra þá hjálpa þær til við að halda hita á nýburum en það er nauðsynlegur liður í umönnum þeirra.