Sprenging kostaði 19 mannslíf í kínverskri kolanámu

Gassprenging í kínverskri kolanámu kostaði 19 námumenn lífið í gærdag og 28 námumenn eru nú innilokaðir niðri í námunni.

Náman er staðsett í Sichuan héraði og nú reyna björgunarmenn að ná niður til þeirra sem lifðu af sprenginguna en þeir eru innilokaðir á um 150 metra dýpi í námunni.

Mun fleiri námumenn voru við vinnu þegar sprengingin varð en í gærkvöldi hafði tekist að ná um 100 þeirra á lífi úr námunni.

Slys eru mjög tíð í kínverskum kolanámum og þannig fórust tæplega 2.000 námumenn í slíkum slysum á síðasta ári.