Stjórnlagaþing Egyptalands samþykkti í gær frumvarp að stjórnarskrá, sem meðal annars felur í sér að sjaría-lög múslíma verði áfram grunnur stjórnskipunar landsins.
Fjölmenn mótmæli hafa verið í borgum landsins undanfarna daga, bæði gegn stjórnlagaþinginu og gegn tilskipunum Muhammeds Morsi forseta, sem í síðustu viku tók sér einhliða nánast alræðisvöld í landinu.
Íslamistar, sem leggja áherslu á að trúin sé undirstaða stjórnmála, eru í meirihluta í stjórnlagaþinginu sem kosið var til fyrr á árinu. Kristnir og veraldlega sinnaðir þingmenn eru andsnúnir frumvarpinu og hafa sumir sagt sig úr stjórnlagaþinginu.
Mohammed Morsi forseti fær svo það hlutverk að efna til þjóðaratkvæðagreiðslu um frumvarpið, sem líklega verður haldin strax um miðjan desember.
Atkvæðagreiðslunni um frumvarpið var skyndilega hraðað í gær, en upphaflega var hún ekki á dagskrá fyrr en eftir tvo mánuði.
Ótti við að hæstiréttur landsins dæmi stjórnlagaþingið ógilt nú um helgina varð til þess að stjórnlagaþingsmenn ákváðu að hraða málinu.
Samkvæmt tilskipun Morsi forseta í síðustu viku tók hann sér ekki aðeins alræðisvöld sjálfur heldur nam hann jafnframt einhliða úr gildi heimildir dómstóla til að skipta sér af stjórnlagaþinginu. Ekkert benti þó til þess að dómstólar landsins hefðu í hyggju að taka mark á þessum tilskipunum forsetans.
Ekkert lát er á mótmælum gegn Morsi, sem kosinn var forseti í júní. Mótmælendurnir eru afar ósáttir við að hann hafi snúið byltingunni gegn Hosni Mubarak og stjórn hans upp í herferð íslamista til að ná völdum í landinu. Hann taki eigin völd og skoðanir fram yfir vilja byltingarhreyfingarinnar.
Sjálfur segist Morsi hins vegar vera að tryggja framgang byltingarinnar með því að taka sér aukin völd og koma í veg fyrir að dómstólar geri störf stjórnlagaþingsins að engu.
KR
KA
