Flamengo segir Messi eiga eftir að bæta markamet Zico

Ekki er víst að Lionel Messi sé sá knattspyrnumaður sem skorað hefur flest mörk á einu almanaksári. Forráðamenn brasilíska félagsins Flamengo segja Zico hafa skorað 89 mörk árið 1979.

Messi skoraði tvö mörk í 2-0 sigri Barclena á Córdoba í fyrri leik liðanna í Konungsbikarnum á Spáni í gærkvöldi. Hann hefur nú skorað 88 mörk á árinu en hann fór fram úr Þjóðverjanum Gerd Muller á sunnudagskvöldið þegar hann skoraði tvö mörk í sigri á Real Betis.

„Við erum ósáttir. Messi hefur ekki náð áfanganum," segir Bruno Lucena tölfræðisérfræðingur hjá Flamengo við brasilíska dagblaðið Lance.

Að sögn Lucena skoraði Zico 81 mark fyrir Flamengo auk sjö fyrir landslið Brasilíu og mark í vináttuleik Argentínu og stjörnuliðs. Þá hafi Zico misst úr tvo mánuði á tímabilinu vegna meiðsla sem geri met hans enn merkilegra.

„Hefði hann spilað allt árið hefði hann skorað yfir eitt hundrað mörk," segir Lucena.