PETA æf út í nýjustu kvikmynd Liam Neeson

Dýraverndunarsamtökin PETA biðla til fólks um að sniðganga nýjustu kvikmynd leikarans Liam Neeson eftir að hann upplýsti að hann hafi borðað úlfakjöt við tökur á myndinni.

Í kvikmyndinni „The Grey" er sagt frá strandaglópum á norðurskautasvæðinu sem þurfa að kljást við hóp af illskeyttum úlfum.

Á meðan tökum stóð stakk leikstjóri kvikmyndarinnar upp á því að úlfakjöt yrði á boðstólum fyrir leikarana. Neeson var afar hrifin af úlfakássunni og sagðist hafa fengið sér ábót.

PETA fordæmir Leeson og aðstandendur „The Grey." Í yfirlýsingu frá samtökunum kemur fram að úlfar séu yfirleitt hlédrægir og forðist mannfólk.

Yfirlýsing PETA endar á þessum fleygu orðum: „Don't just shy away. Run away from The Grey."