Guðmundur búinn að semja við Sarpsborg

Guðmundur Þórarinsson er formlega genginn í raðir norska liðsins Sarpsborg 08 en félagið staðfesti á heimasíðu sinni í dag að hann hefði skrifað undir þriggja ára samning.

Guðmundur staðfesti í vikunni að samkomulagið væri frágengið og aðeins ætti eftir að skrifa undir.

Hann kemur til liðsins frá ÍBV en þar gegndi hann lykilhlutverki í sumar. Þess má geta að Guðmundur fékk hæstu einkunn allra leikmanna Pepsi-deildar karla fædda 1992 eða síðar hjá blaðamönnum Fréttablaðsins og Vísis.