Ólafur Elíasson hannar listaverk fyrir Ólympíuleikana

Listamaðurinn Ólafur Elíasson hefur verið beðinn um að útfæra afar sérstakt listaverk fyrir Ólympíuleikana í Lundúnum í sumar.

Verkefnið er kallað „Take A Deep Breath" og er áætlaður kostnaður þess ein milljón punda.

Með verkefninu vill Ólafur varpa ljósi á hugmyndir sem eitt sinn hafi verið til grundvallar á Ólympíuleikunum. „Leikarnir endurspegla ástand heimsins - þráhyggju okkar gagnvart þeim sem bera af og sigra" sagði Ólafur. „Í staðinn ættum við að einblína á þátttökuna og samkenndina sem eru grunnstoðir leikanna."

Þátttakendur verkefnisins eru beðnir um að taka djúpan anda fyrir góðan málstað og mótmæla um leið sjálfshyggju Ólympíuleikanna. Á vefsíðu verkefnisins geta þátttakendur síðan deilt andardrættinum með öðrum og lýst yfir stuðningi við málstað sinn.

„Ég var beðinn um að hanna listaverk sem fangar anda Ólympíuleikanna. Staðreyndin er sú að það er í raun ekki margt til að fagna þegar kemur að Ólympíuleikunum. Þess vegna ákvað ég að þróa verk sem sviptir hulunni af veikleikum leikanna."

Listaverk Ólafs eru heimsþekkt. Nýlega hannaði hann risavaxna gervi-sól sem lýsti upp stærsta sýningarsal Tate Modern nútímalistasafnsins í Lundúnum. Hann hannaði einnig glerhjúp Hörpunnar.