Gömlu liðsfélagar Eggerts unnu skoska bikarinn

Hearts tryggði sér skoska bikarinn í dag með ótrúlegum 5-1 sigri á Hibernian í úrslitaleik á Hampden Park en þarna voru tvö Edinborgarliðið að mætast. Eggert Gunnþór Jónsson lék með Hearts til áramóta þegar hann fór til enska liðsins Wolves. Hann náði því ekki að spila neinn bikarleik á tímabilinu.

Darren Barr og Rudi Skacel komu Hearts í 2-0 en James McPake minnaði muninn í 2-1 á 41. mínútu. Pa Saikou Kujabi fékk sitt annað gula spjald á 47. mínútu og Hibernian var því manni færri nær allan síðari hálfleik.

Hearts-liðið nýtti sér það og þeir Daniel Grainger, Ryan McGowan og Rudolf Skacel bættu við mörkum og tryggðu Hearts 5-1 stórsigur.

Þetta er fyrsti titill Hearts síðan að liðið varð bikarmeistari árið 2006. Liðið vann þá Gretna eftir vítakeppni. Eggert Gunnþór kom til liðsins haustið eftir og náði því ekki að vinna titil með félaginu.