Stóraukin tíðni heilablóðfalla hjá ungu fólki

Ný rannsókn sýnir að ungt fólk í Bandaríkjunum fær heilablóðfall í síauknum mæli en hingað til hefur slíkt nær eingöngu hrjáð fólk sem komið er á efri ár.

Rannsókn þessi náði til fólks í tveimur ríkjum í Bandaríkjunum og niðurstöður hennar eru að fjöldi heilablóðfall hjá fólki undir 55 ára aldri hafði nær tvöfaldast á tímabilinu frá árinu 1993 og fram til 2005.

Meðal hvítra karla á aldrinum 20 til 54 ára hafði tíðni heilablóðfalla á þessu tímabili vaxið úr 28 á hverja 100.000 íbúa árlega og upp í 48. Hjá svörtum körlum í þessum aldurshóp fór tíðnin úr 83 og upp í 128 heilablóðföll á hverja 100.000 íbúa.

Í frétt um málið á Reuters kemur fram að ekki séu til einhlítar skýringar á því af hverju heilablóðföll aukast svona mikið hjá ungu fólki. Hinsvegar megi leiða líkum að því að offita, sykursýki og hár blóðþrýstingur séu það sem helst veldur aukningunni.

Dr. Brett M. Kissela hjá læknaháskólanum í Cincinnati sem stjórnaði rannsókninni segir að ef einstaklingar eru farnir að þjást af offitu, sykursýki og háum blóðþrýstingi strax um tvítugsaldurinn sé einfaldlega hætta til staðar að þeir fái einnig heilablóðfall á þessum aldri.