Stórt skref í átt að bættu öryggi sjómanna

Aðildarþjóðir Alþjóða-siglingamálastofnunarinnar hafa náð samkomulagi um staðfestingu á svonefndri Torremolios samþykkt. Það þykir eitt stærsta skref sem stigið hefur verið í átt að bættu öryggi sjómanna á fiskiskipum á heimsvísu.

Samþykktin var fyrst gerð árið 1977 en þrátt fyrir ítrekaðar tilraunir hefur aldrei tekist að hrinda henni í framkvæmd. Forsenda þess að hún taki gildi hefur verið sú að tiltekinn fjöldi aðildarríkja Alþjóðasiglingamálastofnunarinnar staðfesti hana en hingað til hefur ekki náðst samkomulag um hve mörg þau þurfa að vera. Í vikunni var ákveðið að þau þyrftu að vera 22 með fiskiskipastól upp á 3600 skip, 24 metra eða lengri.

Ísland staðfesti samþykktina árið 1986 og hefur auk þess beitt sér fyrir þróun hennar og tekið virkan þátt í umfjöllun um öryggi fiskiskipa.

„Þetta er tvímælalaust stærsta skrefið sem stigið hefur verið í átt að bættu öryggi sjómanna á fiskiskipum á heimsvísu," segir Guðfinnur G. Johnsen, sem hefur fylgt málinu eftir fyrir hönd LÍÚ. „Talið er að árlega farist 26 þúsund sjómenn í heiminum en aðbúnaður skipa er víða ansi lélegur bágborin. Samþykktin er liður í því að samræma öryggisþætti sem vonandi mun skila sér í auknu öryggi fyrir sjómenn á fiskiskipum", segir Guðfinnur.

Þetta kemur fram á heimasíðu LÍÚ.